Ubarna Landong

Ubarna Landong

Ku: Abah Wandy

Urang bakal bisa ngarasakeun nikmat jeung kabagjaan hirup lamun awak sehat. Agama Islam kacida mentingkeun kaberesihan, oge ngajarkeun prinsip-prinsip hirup sehat, hirup beresih, dibarengan kasucian lahir batin. Pola hirup sehat ngarupakeun bagean anu wajib jeung mutlak kudu dipimilik keur sakumna umat muslim. Najan loba duit oge ari awak teu sehat mah moal genah, jauh ka tumaninah. Numatak ngajaga kasehatan kacida pentingna. Ngan ieu mah ceuk pangalaman, manusa bakal ngarasa boga sirah lamun keur rieut jangar, genahna boga awak sehat teh lamun geus ngalaman gering, tapi aya deui pamanggih anyar anu geus heubeul leuwih hade nyegah tibatan ngubaran

“Kunaon Ma pupuringisan jiga aya nu karasa?” tanya Ceu Ijah bari gek diuk gigireun Ma Emi anu keur nangunjar

“Ah Nyai ari geus kolot mah geuning loba anu karasa, geus puguh nyeri suku, rieut sirah, lalinu saawak-awak, mules bitis oge ieu teh can cageur ayeuna kalah nambahan deui panyakit teh nyeri kiih teu kuhanteu,” tembalna

“Atos dilandongan atuh?” tanyana deui

“Ieu oge eukeur diubaran ku landong, ngan acan cageur geuning da karasa masih nyareri keneh awak teh. Jigana lamun cageur mah pasti sehat,” pokna teu euleum-euleum

“Panginten eta mah sanes ubarna landong teh Ma, ari can cageur wae mah,” tempas Ceu Ijah

“Ah sok nyanyahoan wae Nyai mah, pan ieu ubar teh ti dokter, sok baca kadinyah!” ceuk Ma Emi bari ngasongkeun satumpukan ubar, gap ditampanan bari terus diilo

“Ari ieu salep cap dua anting kanggo landong naon Ma?” Ceu Ijah nanya bari nembongkeun salep

“Sssttt … tong geruh eta mah ubar salep keur singkayo,” tembal Ma Emi semu ngaharewos

“Ooohhh … tong dihijikeun sareng landong atuh Ma bilih pagentos. Der ubar singkayo dilamotan pibahlaeun. Beu ieu aya lipen seug merk alus, sunscreen, wedak, parfum, kitek, krim siang, malam meni kumplit kieu. Ari keluhan anu karaos ku Ema ayeuna naon wae?” tanya Ceu Ijah hayang mastikeun

“Heu ieu we rieut sirah, mules bitis, nyareri awak, jeung nyeri kiih deuih,” tembalna

“Oooh ari kanggo nyeri kiih mana Ma geuning teu aya landongna?” tanyana deui

“Acan aya keur ubar nyeri kiih mah, kakara rek engke sore ka kilinikna oge,” tembalna

“Oooohh …, paingan atuh. Ieu teh kieu Ma abdi ngahaja nepangan Ema kadieu seja ngawakilan rerencangan senam ngalayad Ema, pedah aya wartos Ema ngaringkuk saurna, oge hariwang deuih bilih kumaha onam, katambih teu aktif dina grup WA,” omong Ceu Ijah ngajentrekeun maksudna

“Aah ieu mah lain gering Nyai, ukur nitah istirahat we, sibuk teuing Emana jigana mah, apan dua poe katukang tas nyaba jauh, momotoran jeung si Aki ti Argentina Cianjur (maksudna Agrabinta Red). Heu nuhun kituh bejakeun ka cees Ema, hampura minggu kamari teu bisa miluan senam, sugan we atuh minggu hareup mah cageur, doakeun ku Nyai jeung Nyi Hajjah kabeh, Ema hayang miluan deui senam keributan, geus carangkeul ieu oge,” tembalna

“Insya Allah ke didugikeun dina grup WA. Ari hape Ema kamana kitu?” Ceu Ijah nalengteng

“Numatak diinjeum ku si Aki, pedah euweuh kuotaan nu manehna mah. Dasar Aki-aki sok licik sorangan, ari Ema nginjeum mah sok tara mere, teu jiga manehna butuh sok ginceng-ginceng we bari tara bebeja heula. Atuh Ema kesepian teu bisa WAan jeung borondong,” tembalna jiga nu keuheul

“Kamana kitu si Aki ayeuna?” ceuk Ceu Ijah bari ngareretan ka jero imah

“Duka teuing kamana, ngan bebejana mah rek konser cenah,” tembalna pondok. Sakedapan Ceu Ijah ngahuleng mikiran jawaban Ma Emi

“Konser naon Ma, musik dangdut atawa pop?” Ceu Ijah hayang mastikeun

“Lain Nyai, ngadu manuk, konser ngadu manuk,” tembalna tiis. Ceu Ijah ukur nyenghel ngadenge aya konser ngadu manuk

“Lain konser atuh Ma, kontes meureun ari ngadu manuk mah,” Ceu Ijah ngajentrekeun

“Iih ari taeun teh sok nyanyahoanan wae Nyai mah, konser Nyai lain kontes, ceuk si Aki oge konser,” tembalna keukeuh. Ceu Ijah ukur bisa nyenghel cumah dijelaskeun oge pikirna

“Enya kumaha Ema we, mung Ema bade diparios nyeri kiih bade iraha?” tanya Ceu Ijah nyalenggorkeun omongan

“Jigana mah engke sore, da ceuk incu oge dokter THT mah buka praktekna unggal poe Salasa jeung Jumaah,” tembalna. Sakedapan Ceu Ijah kerung bari bingung ngabandungan Ma Emi anu nyeri kiih rek dipariksa ka dokter THT

“Naha Ma nyeri kiih dipariksa ka dokter THT, teu salah?” tanya Ceu Ijah meni kerung-kerung we

“Ah ari Nyai sok nyanyahoanan wae kolot. Nyeri kiih mah dimana-mana oge kudu ka dokter spesialis THT ceuk si Aki oge,” tembalna pasti

“Duuh bahaya pisan ieu mah … mudah-mudahan peristiwa gawat darurat tidak terjadi, karena hari ini telah terjadi penyelewengan akronim dari THT, dan hal ini tidak bisa dibiarkan begitu saja, karena akan berdampak yang berbahaya bagi generasi muda dan bisa-bisa menghambat pencapaian generasi emas di tahun 2045 nanti,” gerentes Ceu Ijah bari keom. Dasar saruana, naon hubunganana generasi emas 2045 jeung THT asa jararauh

“Ema ieuh dokter THT mah mariksa Telinga Hidung jeung Tenggorokan, lain panyakit nyeri kiih, kade salah eta mah,” Ceu Ijah ngajelaskeun

“Aahh … ceuk si Aki oge lamun nyeri kiih kudu ka dokter spesialis THT, Nyai,” pokna deui keukeuh

“Pasti … jeung yakin surayakin ieu mah salah ngahartikeun huruf H, Gusti Anu Maha Suci. Emh deudeuh teuing Ema. Eta deuih tah Aki-aki nurustunjung, dasar kolot notorogan teu watir-watireun ngaprank pamajikan. Lamun aya moal teu dicekek tah ku aing Aki-aki kolot kumaneh teh,” gerentes Ceu Ijah semu ambek

“Ieu deuih Nini-nini dalapan mulud teu beunang dibejaan, neugtreug we, disalah-salah teh, sarua gejulna. Hi hi waas nyeri kiih dipariksa ku dokter spesialis THT jadi hayang seuri badag. Kop tah mere dokter nini-nini dalapan mulud,” omong Ceu Ijah bari keom *** Cag ah.

19 Desember 2023 keur nganjang di Lembur