Pupujian Idul Fitri

Pupujian Idul Fitri

Ku Ambu Ida

 

Idul Fitri atos dugi
Sasih Sawal kaping hiji
Sadaya umat ngahiji
Silih hapunten nya diri

Diri bilih aya salah
Tina sakur nu dilampah
Apan bener rajeun robah
Nu ngajalankeun ibadah

Sasasih urang puasa
Nahan sakur laku dosa
Lapar halabhab nu rosa
Supados tamat puasa

Teu hilap urang tadarus
Ngaos Kur’an masing alus
Dawamkeun kedah tumerus
Ibadah sing lulus banglus

Eusi Kur’an urang wincik
Tajwid makhroj masing telik
Hartina urang talungtik
Supados janten pangatik

Mungkas puasa ku zakat
Maparin ka nu masakat
Malar rijki nu mangpaat
Di dunya rawuh ahérat.

Zakat fitrah zakat harta
Kaluarkeun tong léléda
Wajib kanggo sadayana
Jalmi mampuh utamina

Nu wajib zakat muzaki
Sing saha nu sugih mukti
Poma ulah rék kumaki
Harta titipan ti Gusti

Mustahiq hak nampi zakat
Mugia janten mangpaat
Ti muzaki nu tos haat
Keur bagja dunya ahérat

Zakat fitrah zakat harta
Wajib pikeun nu kawasa
Kawasa ku harta banda
Karana Alloh Ta’ala

Hukum zakat fitrah nyata
Wajib kanggo sadayana
Saemud ukuranana
Ku tuangeun nu biasa

Tuangeun anu biasa
Sadidinten henteu suda
Roti sampeu béas korma
Sareng nu lian-lianna

Zakat harta saéstuna
Hasil tatanén nu nyata
Tur sato nu dipiara
Bati usaha niaga

Emas ogé teu kalangkung
Nu disimpen taun-taun.
Zakatan ulah rék bingung
Supados janten panuyun

Ari nu hak nampi zakat
Nya aya dalapan asnap
Fakir miskin jeung mu”alaf
Amil ghorim teu kaliwat

Hamba sahaya gé sami
Sabilillah henteu lali
Ibnu sabil tong kaluli
Paparin masing kadugi

Kadugi masing walatra
Ulah rék dibéda-béda
Ka sadayana baraya
Mugia sing janten bagja

Pareng wengi lilikuran
I’tikap teu kapayunan
Di masjid teras wiridan
Ditumbu ku tadarusan

Wengi lailatul qodar
Kaum muslimin tatahar
Supados urang kaganjar
Hidayah haté nu janglar

Ping hiji sawal solat id
Énjing-énjing indit sirib
Muru ka lapang masigit
Solat sunat anu galib

Réngsé solat Idul Fitri
Sasalaman jeung tatanggi
Kulawargi kitu deui
Silih hampura hakiki

(*)