Dua Gurat Bulao

Dua Gurat Bulao

(Tatang Rancabali)

Anjeun neuteup seukeut pinuh harendeg
Panon carindul bari masih keneh beueus
Ngajengjen di sisi jalan

Lar nu ngaliwat bari ngareret
Anteb nelek-nelek nyeleksek
Anjeun ngabalieur semu keuheul
Ley ngaleketey bari ngeluk neuteup beuteung bureuyeung

Anjeun kalalanjoanan dina lampah
Sanajan aya nu tanggung jawab
Tapi angger moal teger
Moal paler ku dileler

Niley akademi lain jaminan diri
Ayeuna ngajirim bukti
Anjeun kacingcirihi keur ngandung jabang bayi

Anjeun lain kuring
Kuring lain anjeun
Kerung ku hanjelu minuhan kalbu
Sakeudeung deui geunjleung eundeur sadadayeuh
Ear sajajagat ku goarna budak gelar ka alam dunya

Rancabali,12-12-2023:12.12