Wareg

Ku : Abah Wandy

Ari keur nyorangan di imah teh sok ras inget ka Caca Handika penyanyi dangdut urang Tasikmalaya tea geuning. Laguna teh ‘Masak-masak sendiri, makan-makan sendiri … jst’, heu kaayaan kuring oge ayeuna teh kitu pisan, nyorangan, sagala rupa ku sorangan, ti mimiti balanja nepi ka masak jeung kukumbah nya wayahna ku sorangan. Tapi sok sanajan kitu, kuring tetep ikhlas, sabab ngarah ngeunah ngalakonana.

 

Da lamun tea mah ngarasula, angger masalah moal beres ku ngarasula, samalah mah kalah nambahan karijut kana sagala rupaning kulit
Meureun ceuk basa legegna mah hirup kuring keur home alone, tapi hirup kieu teh keur kuring mah alhamdulillah matak ngahenang-hening, tiis ceuli herang mata.

 

Najan sorangan teu ieuh matak ngajadikeun aral subaha, sabab geus jadi pilihan hirup, malah kuring tetep sukuran, utamana masih bisa hirup bari sehat najan sorangan oge. Cenah ceuk batur hirup babarengan memang aya kasebutna endah, enya bener, tapi nyorangan oge teu matak ngajadikeun nyeri hate, malah sabalikna matak wareg, beh dituna weureu seubeuh

 

Sok bandungan, sakumaha ceuk katerangan, boga hate ikhlas bakal mawa katingtriman ka sing saha wae jalma anu daek tumarima kana kaayaan
“Bener pisan kitu Jang, boga hate ikhlas mah hirup teh bakal wareg ku katenangan,” ceuk Kang Udi
“Enya kitu pisan Kang, najan di imah euweuh beas, ukur aya hui boled oge ari dibarengan ku ikhlas mah genah we.

 

Keur kuring saayeunaeun mah ukur ngaganjel beuteung teu kudu dahar sangu, ngulub hui dua guruntul anu pamere ti Akang oge alhamdulillah matak seubeuh,” tembal Jang Isom
“Heu rek teu seubeuh kumaha atuh ari hui sagede peureup Mek Tison mah, komo Ujang mah hirup nyorangan, pasti dahar hui teh jeung bekokna kabeh, nya pasti weureu seubeuh, nya weureu, nya seubeuh, he he he, “ tempas Kang Udi bari nyenghel *** Cag ah