TAUN ANYAR

Sawareh jempe dina matapoe ngararasakeun nyongkabna dunya ngahuru dada-dada raca, dada-dada tatu,

ngarerab jajantung nu geus lila ngaradang kudadasna dosa beulah mana jatining suci?

nu kenca nu katuhu geus rimbil ditiir gindi pikir geus patulayah ditigas sarakah jeung amarah

Dina ceuli-ceuli nu rebing

geus ditompokeun hariring kingkin

nu ngarasula pedah kabeakeun alas proyek rehabilitas pasilitas antara wangunan atikan jeung alat-alat kasehatan

nu bangkenu pedah teu kabagean nawu ngaharewos nepikeun pangarep napsu

ngung-ngong ceuk ieu adil ceuk ieu sah ceuk ieu bener

teuing atuh teu nyaho ceuk cacah bari rumanggieung nahan lapar jeung hanaang

Renghap-renghap pondok karasa ngawirahma dina haroshosna sora ieu artos kanggo salira ieu mobil kanggo salira

sakapeung paselang renghap birahi

ngahebos kana beungeut-beungeut limit dihiias liquid

ramo-ramo ranggoas ngaranggeum dada nu neuhneur disuntik silikon geus kitu taya nu nyora taya nu daya

ngalempreh patunjang-tunjang dibalut dosa

Dina taun anu anyar ieu

walehkeun geusan mungkas lalakon koneas katambias dina jalan-jalan leucir tanpa semir

urang alewohkeun ku  karumasaan dina kateudayaan urang incah tina jalan salah

mugi dina widi Gusti

1443 H POE MUNGGGARAN